លោក បៃដិន ថ្លែងសន្ទរកថានៅចំពោះមុខសភា សរុប១០០ថ្ងៃដំបូង នៃការកាន់តំណែង

April 29, 2021
Posted by: Admin
Category: ព័ត៌មានទូទៅ

នៅថ្ងៃពុធ ទី២៨ ខែមេសានេះ លោកចូ បៃដិន នឹងត្រូវចូលទៅថ្លែងសន្ទរកថា ជាលើកទីមួយ នៅចំពោះមុខសភាខុនហ្ក្រេស ជាលើកទី១ ក្នុងឱកាស១០០ថ្ងៃនៃការកាន់អំណាច របស់រដ្ឋាភិបាលលោក។ នេះគឺជាឱកាសដែលលោកនឹងត្រូវបង្ហាញ អំពីឆន្ទៈនយោបាយរបស់លោក ក្នុងការធ្វើកំណែទម្រង់ធំៗ ទាំងក្នុងវិស័យពន្ធដារ សេដ្ឋកិច្ច និងវិស័យសង្គមកិច្ច។

លោកចូ បៃដិន នឹងថ្លែងបង្ហាញ អំពីឆន្ទៈ ទស្សននយោបាយ ដឹកនាំប្រទេសសម្រាប់អាណត្តិ៤ឆ្នាំរបស់លោក។ តាមការរំពឹងទុក លោកនឹងថ្លែងអំពី « គម្រោងជួយគ្រួសារអាមេរិក » តាមរយៈការវិនិយោគដ៏ច្រើនសម្បើម នៅក្នុងវិស័យអប់រំ។ រដ្ឋាភិបាលលោក ចូ បៃដិន នឹងដំឡើងពន្ធ យកពីប្រជាជនអាមេរិក ដែលមានជីវភាពស្តុកស្តម្ភ យកមកចំណាយចាយវាយក្នុងកិច្ចការសង្គម។ តាមការលើកឡើង របស់បណ្តាញព័ត៌មានអាមេរិក អត្រាពន្ធលើប្រាក់ចំណូល សម្រាប់អ្នកមានជីវភាពធូរធាបំផុត ប្រមាណ ០.៣%នៅអាមេរិក គឺនឹងឡើងពី ២០% ទៅ ៣៩.៦% ពោលគឺសឹងតែទ្វេជាពីរ។

លោកចូ បៃដិន នឹងថ្លែងផងដែរ ដើម្បីការពារផែនការផ្តល់សន្ទុះសេដ្ឋកិច្ច ដែលមានទឹកប្រាក់ប្រមាណ ១៩០០ពាន់លានដុល្លារ ហើយដែលសភាខុសហ្ក្រេស ត្រូវចាប់ផ្តើម ប្រជុំជជែកគ្នា មុននឹងអនុម័តយល់ព្រម។ បន្ថែមពីនេះ លោកចូ បៃដិន ប្រាកដជានឹងលើកឡើង អំពីលទ្ធផល យ៉ាងគាប់ប្រសើរ នៅក្នុងយុទ្ធនាការប្រយុទ្ធប្រឆាំងការឆ្លងរាលដាល កូវីដ១៩ ក្នុងរយៈពេល៣ខែ ដើមអាណត្តិរបស់លោក។ ប្រជាជនអាមេរិក ប្រមាណ៩៦លាននាក់ ពោលគឺ៣០%នៃប្រជាជនសរុប គឺបានទទួលវ៉ាក់សាំងការពារកូវីដ១៩ បានគ្រប់អស់ហើយ។

ដោយឡែក លោកស្រី Jen Psaki អ្នកនាំពាក្យសេតវិមាន បានបញ្ជាក់ថា លោក ចូ បៃដិននឹងថ្លែងលើកឡើងផងដែរ អំពីការប្តេជ្ញារបស់លោក ក្នុងការនាំសហរដ្ឋអាមេរិក ឲ្យដើរតួនាទីសំខាន់ នៅក្នុងកិច្ចការនយោបាយអន្តរជាតិ តាមរយៈការពង្រឹងចំណងសហការជាមួយប្រទេសសម្ព័ន្ធមិត្ត។ ទំនាក់ទំនងរវាងចិន និងសហរដ្ឋអាមេរិក ក៏នឹងត្រូវលោកចូ បៃដិន លើកមកនិយាយក្នុងឱកាសនេះដែរ។

គួរកត់សំគាល់ថា ១០០ថ្ងៃនៃការផ្តើមអាណត្តិថ្មី ដឹកនាំដោយលោក ចូ បៃដិន គឺបានប្រព្រឹត្តិទៅដោយរលូន គ្មានរឿងអាស្រូវធំដុំ ដូចកាលពីសម័យលោកដូណាល់ ត្រាំទេ។ គេនៅចាំបាន នៅពេលលោក ដូណាល់ ត្រាំ ចូលទៅថ្លែងសន្ទរកថា នៅវិមានកាពីតូល លោកបានបដិសេធ មិនចាប់ដៃជាមួយលោកស្រី ណាន់ស៊ី ប៉េឡូហ្ស៊ី ប្រធានសភាតំណាង។ ហើយគ្រាន់តែលោកត្រាំថ្លែងសន្ទរកថាចប់ភ្លាម លោកស្រីប៉េឡូហ្ស៊ី បានហែកក្រដាសសន្ទរកថានោះចោលភ្លាមដែរ៕បទវិភាគព័ត៌មាន៖ ដោយយោងទៅតាមប្រភពព័ត៌មានខាងលើនេះបង្ហាញសហរដ្ឋអាមេរិក អាចនិងធ្វើអោយសេដ្ឋកិច្ចមានការល្អប្រសើរ ឡើងវិញក្នុង ពេលឆាប់ៗខាងមុននេៈ